Di ‎[Facebook] Aya Grup Sunda! Dina paguneman di eta group, seueur pisan katampi istilah Kasundaan nu di posting ku anggota Group. Aya nami-nami tuangeun khas Sunda, Kaulinan, Kasenian, pokonamah sakur budaya sapopoe nu jadi kabiasaan jeung hirup di urang Sunda tapi geus lila nyingray tina pamikiran jeung kehirupan urang Sunda sorangan. Loba barudak ayeuna nu tangtuna geus paroho teu arapal kana istilah-istilah atawa budaya Sunda sorangan. Aya hiji nu matak jadi ngeunah seuri dina eta group, ciri nu matak jadi bukti jeung matak suka ning ati, Urang Sunda memang resep heureuy jeung cawokah. Cawokah teh ngandung harti kecap-kecap heureuy nu rada nyerempet kana urusan jorang. Tapi lain jorang nu saujratna komo buligir mah bahasana. Urang Sunda mah cawokah tapi cukup ku bungkusan jeung pulasan babasaan nu matak ngarti maksudna tapi heureuy jeung seuri maksud tujuanana mah. Cawokah memang salah sahiji kabiasaan heureuy nu aya di urang Sunda. Eta jadi lalab dina sakur gunem catur dimana wae kumpulna urang Sunda. Naha eta mah di saung sawah bari ningalikeun nu macul, atawa ngarambet gacong, di pos ronda bari gapleh atawa catur, dina pagempungan lembur sarupaning tahlil atawa kumpulan lembur. Eta teh lumayan jadi ragi jeung patri nu ngajaga silaturrahmi jeung duduluran di lingkungan urang Sunda. Hiji koncina Cawokah lain hartina Jorang. :) ;)